2017թ. սեպտեմբերի 27-28-ին ՅՈՒՆԻՍԵՖ-ի գլխամասային գրասենյակի Տվյալների և վերլուծությունների բաժինը՝ Հաշմանդամության վիճակագրության Վաշինգտոնյան խմբի (WG) հետ համատեղ, Նյու Յորքում անցկացրեց երեխաների հաշմանդամության չափման աշխատաժողով, որին մասնակցեց նաև «Ի. ԷՍ. ԱՅ» խորհրդատվական խմբի անդամ Սոֆի Բարոյանը:
ՅՈՒՆԻՍԵՖ-ի գրասենյակի աջակցությամբ՝ հայ մասնագետները հնարավորություն ունեցան քննարկելու երեխաների հաշմանդամության չափման հետ կապված հայեցակարգային և տեսական հարցեր, ինչպես նաև վերանայել այն մեթոդներն ու գործիքները, որոնք նախկինում կիրառվել են՝ այս ոլորտում տվյալների հավաքագրման համար:
Աշխատաժողովը միավորեց ոլորտի փորձագետների և գործնական փորձ ունեցող մասնագետների, ովքեր հատկապես հետաքրքրված են երեխաների հաշմանդամության խնդիրների լուծումներ գտնելով: Միջոցառման հիմնական նպատակը երեխաների հաշմանդամության չափման լավագույն մոտեցումների վերհանումն էր:
Հայաստանյան մասնակիցները, այսպիսով, թարմացրին երեխաների հաշմանդամության հետ կապված տվյալների հավաքագրման, վերլուծության, մեկնաբանման և կիրառության գիտելիքները: Աշխատաժողովի ավարտին մասնակիցները ստացան հավաստագրեր:
Միջոցառումն օգտակար էր «Ի. ԷՍ. ԱՅ» խորհրդատվական խմբի թիմին՝ նոր գործընկերների հետ կապեր ստեղծելու, ինչպես նաև երեխաների հաշմանդամության հարցերով հայեցակարգերի, մոդելների և չափորոշիչների վերաբերյալ ընդհանուր պատկերացումներ ստանալու համար:
Երեխաների հաշմանդամության վերաբերյալ որակյալ տվյալների հավաքագրումը «Ի. ԷՍ. ԱՅ» խորհրդատվական խմբի առաջնահերթություններից է: Մենք շարունակելու ենք աջակցել մեր գործընկերներին երեխաների հաշմանդամության մասին տվյալների հավաքագրման և մեկնաբանման, այդ տվյալների արդյունավետ կիրառման և տարածման, ինչպես նաև հստակ նպատակներով, չափորոշիչներով և մեթոդների ներառմամբ տվյալների համապարփակ պլանի մշակման հարցում:
Սոֆի Բարոյանը՝ որպես «Ի. ԷՍ. ԱՅ» խորհրդատվական խմբի ներկայացուցիչ, հավաստագիր ստացավ:
